gulf

ക്നാനായ വ്യക്തിയുടെ ഇടപെടൽ വീടുകളിലെ സ്വകാര്യ ചടങ്ങുകളിൽ മദ്യം വിളമ്പാൻ ലൈസൻസ് ആവശ്യമില്ലെന്നു ഹൈക്കോടതി.

Saju Kannampally  ,  2017-06-23 09:40:55pmm

കൊച്ചി ∙ക്നാനായ വ്യക്തിയുടെ ഇടപെടൽ -  വീടുകളിലെ സ്വകാര്യ ചടങ്ങുകളിൽ മദ്യം വിളമ്പാൻ ലൈസൻസ് ആവശ്യമില്ലെന്നു ഹൈക്കോടതി. വീടുകളിലെ സ്വകാര്യ ചടങ്ങുകളിൽ മദ്യം വിളമ്പാൻ ലൈസൻസ് ആവശ്യമില്ലെന്നു ഹൈക്കോടതി. സ്വകാര്യ ചടങ്ങുകളിൽ വീട്ടിലെത്തുന്ന അതിഥികൾക്കു മദ്യം വിളമ്പുന്നത് ആതിഥ്യ മര്യാദയുടെ ഭാഗമായതിനാൽ ലൈസൻസ് നിഷ്കർഷിക്കുന്നതു ന്യായമല്ല. ദുരുപയോഗമുണ്ടെങ്കിൽ സർക്കാരിനു നടപടിയെടുക്കാം. ‘അതിഥിദേവോ ഭവ’ യിൽ വിശ്വസിക്കുന്ന നാം വീട്ടിലെത്തുന്ന അതിഥിക്ക് ഒരു ഗ്ലാസ് വൈൻ നൽകിയാൽ പോലും മദ്യവിൽപനയാകുമെന്ന സർക്കാർ വാദം ഞെട്ടിക്കുന്നതാണെന്നു കോടതി പറഞ്ഞു.

 

100 രൂപ വില വരുന്ന ഒരു ഗ്ലാസ് വൈൻ വിളമ്പാൻ 50,000 രൂപ കൊടുത്തു ലൈസൻസ് എടുക്കണമെന്നു പറയുന്നതു യുക്തിസഹമല്ല. ദുരുപയോഗം തടയാൻ, വ്യക്തിക്കു കൈവശം വയ്ക്കാവുന്ന അളവിൽ കൂടരുതെന്നും വിൽപന പാടില്ലെന്നും പൊതുസ്ഥലത്ത് അരുതെന്നുമുള്ള വ്യവസ്ഥകൾ സർക്കാർ ഉറപ്പാക്കണം. വീട്ടിലെ ചടങ്ങിൽ മദ്യം വിളമ്പുന്നതിൽ എക്സൈസ്, പൊലീസ് അധികൃതർ ഇടപെടരുതെന്നാവശ്യപ്പെട്ട് കോട്ടയം പേരൂർ ഇടവക വെള്ളാപ്പള്ളി  അലക്സ് വി. ചാക്കോ സമർപ്പിച്ച ഹർജി അനുവദിച്ചാണു ഡിവിഷൻ ബെഞ്ചിന്റെ ഉത്തരവ്.

കോടതി നിഗമനം:

∙ വീടും അനുബന്ധ പന്തലും പൊതുസ്ഥലമായി കാണാനാവില്ല. വീട്ടുപരിസരങ്ങളിൽ സ്വകാര്യ ചടങ്ങുകൾക്കു മദ്യം വിളമ്പാൻ ലൈസൻസ് വ്യവസ്ഥ ബാധകമല്ല. സർക്കാർ പറയുന്നത് അംഗീകരിച്ചാൽ ഓരോ വ്യക്തിയും വീട്ടിലെത്തുന്ന അതിഥിക്ക് ഒരു ഗ്ലാസ് വൈൻ നൽകാൻ ലൈസൻസ് നേടി കണക്കു സൂക്ഷിക്കേണ്ടി വരും.

∙ കുടുംബപരമായ ചടങ്ങുകളിൽ മദ്യം വിൽക്കില്ല. അതിഥികൾക്കു മദ്യം വിളമ്പുന്നതു സമ്മാനമോ ആ നിലയ്ക്കു വിൽപനയോ ആവില്ല.

∙ അനിയന്ത്രിതമായ മദ്യ ഉപയോഗം സാമൂഹിക വിപത്തായി മാറുമെന്ന ഭീതി സർക്കാരിനുണ്ട്. എന്നാൽ, ദുരുപയോഗം തടയാനുള്ള വേണ്ടത്ര മാർഗങ്ങൾ സർക്കാരിനുണ്ട്. ഒരാൾക്കു കൈവശം വയ്ക്കാവുന്ന മദ്യത്തിനു പരിധി വച്ചിട്ടുള്ളതും പൊതുസ്ഥലത്ത് അരുതെന്നും മറ്റും വ്യവസ്ഥകൾ അതിനാണ്.

സർക്കാരിന്റെ വാദം:

ഹർജിക്കാരുടെ വാദം അനുവദിച്ചാൽ വീടുകൾ മദ്യശാലകളായി മാറും. വീട്ടിലേക്കു പൊതുജനങ്ങളെ ക്ഷണിക്കുമ്പോൾ അതു പൊതുചടങ്ങാണ്. വിദേശമദ്യ ചട്ടത്തിലെ 13 (6) വകുപ്പനുസരിച്ച് എഫ്എൽ–6 ലൈസൻസ് വിശേഷാവസരങ്ങളിലേക്കുള്ളതാണ്; വിൽപനയ്ക്കല്ല. സൽക്കാരത്തിനിടെ മദ്യം വിളമ്പുന്നതു വീട്ടിലെത്തുന്നവർക്കുള്ള സമ്മാനമാണ്. അബ്കാരി നിയമത്തിലെ നിർവചനമനുസരിച്ചു സമ്മാനം നൽകുന്നതു വിൽപനയാകും. വ്യക്തിക്കു മദ്യം കൈവശം വയ്ക്കാൻ അനുമതി വ്യക്തിഗത ആവശ്യത്തിനാണ്, അതിഥികൾക്കു വിൽക്കാനല്ല. ബന്ധപ്പെട്ട ചട്ടം ചോദ്യം ചെയ്യാത്ത നിലയ്ക്കു ലൈസൻസില്ലാതെ വിളമ്പാൻ അനുവദിക്കരുത്.

ഹർജിക്കാരന്റെ വാദം:

2012 ഡിസംബർ 14ലെ സർക്കാർ ഉത്തരവനുസരിച്ച് ഒരാൾക്കു രണ്ടര ലീറ്റർ വിദേശനിർമിത വിദേശമദ്യം കൈവശം സൂക്ഷിക്കാമെന്നതിനാൽ വീട്ടിലെ പ്രായപൂർത്തിയായ ആറംഗങ്ങൾക്കും കൂടി 15 ലീറ്റർ കൈവശം വയ്ക്കാം.  മാമോദീസ, മനസമ്മതം, വിവാഹനിശ്ചയം, ചന്തംചാർത്തൽ തുടങ്ങി വിശേഷാവസരങ്ങളിൽ ചിലരെങ്കിലും മദ്യം വിളമ്പുന്ന കീഴ്‌വഴക്കമുണ്ട്. 2015ൽ വീട്ടിൽ നടന്ന രണ്ടു ചടങ്ങുകൾക്ക് 50,000 രൂപ വീതം അടച്ച് എഫ്എൽ–6 ലൈസൻസ് വാങ്ങേണ്ടിവന്നു. ഇനി നടക്കുന്ന മാമോദീസ ചടങ്ങിൽ മദ്യം വിളമ്പാൻ ലൈസൻസ് എടുത്തില്ലെങ്കിൽ റെയ്ഡ് നടത്തുമെന്നാണ് എക്സൈസ്, പൊലീസ് അധികൃതരുടെ നിലപാട്. പൊതുസ്ഥലത്തു മദ്യപാനമോ വിൽപനയോ കൈവശം വയ്ക്കാവുന്നതിൽ കൂടുതൽ മദ്യമോ ഇല്ലാത്ത സാഹചര്യത്തിൽ പൊലീസ്, എക്സൈസ് അധികൃതരുടെ ഇടപെടൽ തടയണം.

വീട്ടിൽ എത്ര അളവിൽ മദ്യം സൂക്ഷിക്കാം

കൊച്ചി ∙ വീടുകളിലെ സ്വകാര്യ ചടങ്ങുകളിൽ ലൈസൻസില്ലാതെ വിളമ്പാവുന്ന മദ്യത്തിന്റെ അളവ് ആതിഥേയന്റെ വീട്ടിലെ പ്രായപൂർത്തിയായ സ്ഥിരാംഗങ്ങളുടെ കൈവശം വയ്ക്കാവുന്ന മദ്യത്തിന്റെ പരിധിയാണ്. മാത്രമല്ല, വീട്ടുപരിസരങ്ങളിലല്ലാതെ ഹാളിലും മറ്റും നടക്കുന്ന ചടങ്ങുകൾക്ക് ഹൈക്കോടതി വിധി ബാധകമാവില്ല. ഹാൾ ആകുമ്പോൾ അബ്കാരി നിയമത്തിലെ 15 (സി) വകുപ്പനുസരിച്ചു പൊതുസ്ഥലത്തു മദ്യപാനത്തിനുള്ള നിരോധനം ബാധകമാകും.

2012 ഫെബ്രുവരി 14 ലെ ഉത്തരവു പ്രകാരം പ്രായപൂർത്തിയായ ഒരു വ്യക്തിക്കു കൈവശം വയ്ക്കാവുന്ന മദ്യത്തിന്റെ അളവ് (ലീറ്ററിൽ) കള്ള്–ഒന്നര, വിദേശ നിർമിത വിദേശ മദ്യം–രണ്ടര, ഇന്ത്യൻ നിർമിത വിദേശ മദ്യം–മൂന്ന്, ബീയർ– മൂന്നര, വൈൻ–മൂന്നര, കോകോ ബ്രാണ്ടി–ഒന്ന് എന്നിങ്ങനെയാണ്. കുടുംബ ചടങ്ങുകളിൽ മദ്യം വിളമ്പാൻ തടസ്സമാകുംവിധം വീടോ അനുബന്ധ പന്തലോ ‘പൊതുസ്ഥലം’ ആയി കണക്കാക്കാമോ അതിഥികൾക്കു വിളമ്പുന്നതു വിൽപനയാണോ തുടങ്ങിയ നിയമപ്രശ്നങ്ങളാണു കോടതി പരിശോധിച്ചത്.

ലൈസൻസില്ലാതെ മദ്യം വിളമ്പാൻ അനുവദിച്ചാൽ വീടുകൾ ബാറുകളായി മാറുമെന്ന സർക്കാരിന്റെ ജാഗ്രത പ്രശംസനീയമാണെങ്കിലും അതു നിഷ്കർഷിക്കാനുള്ള നടപടിക്രമം അത്ര പോരെന്നാണു കോടതിയുടെ വിലയിരുത്തൽ.

 

കടപ്പാട് : മനോരമ



Latest

Copyrights@2016.